ልጃችን ፊሊጶስ በቤተሰቡ፣በዘመዶቹና በጓደኞቹ ዘንድ እጅግ በጣም ተወዳጅ፣ትሁት፣ሩህሩህ፣ሰውን አክባሪ፣ታዛዥ፣አርቆ አሳቢ፣ ፈጣን፣መሸነፍን የማይወድ፣ ጥሩ ልብ ያለው፣የመሪነት ባሕሪን የተላበሰ፣ፍቅር ሰጪ፣ ቀልደኛ እንዲሁም በቤተሰብ መሰባሰብ ላይ ዋና አስተባባሪ፣ ጨዋታና ደስታ የመፍጠር ልዩ ተሰጦ ሲኖረው ለሰዎች ስሜት በመጠንቀቅ ነገሮችን አስተውሎ በግልጽ በማስረዳት ብሎም ከማንኛው ሰው ጋር ታላቅ የመግባባት ችሎታ የነበረው ልጅ ነበር ፡፡ ከዚህም ችሎታው የተነሳ በልጅነቱ የመጀመሪያዎ ጥቁር የሲውድን ጠቅላይ ሚኒስትር መሆንን የሚመኝ ከዛም የሕግ ትምህርትን በመማር ለሰው ልጆች ፍትህ ማስፈን የሚፈልግ ሆኖም ግን ሕይወቱ ከማለፉ ጥቂት ወራቶች በፊት የነበረውን ሀሳብ በመቀየር ወደ ፊት ዲፕሎማት ሆኖ በኢትዮጵያና በተለያዩ ሀገራት እየተዘዋወረ መስራት እንደሚፈልግ ሲነግረን ቋይቷል፡፡ በተጨማሪም ብዙ መልካም ነገሮችን ለሀገሩ ለማበርከት ከወዲሁ የሚሻና የሚመኝ ታዳጊ ልጅ ነበር፡፡ 

ፊሊጶስ በትምህርት ቤቱም ሆነ በቅርብ ቤተሰቦቹ እንደሚነገርልት የጠቅላላ እውቀቱ ከፍተኛ የሆነ፣ የፖለቲካ ፍላጎቱና እውቀቱ የዳበረ እንዲሁም ጥሩ ተናጋሪ የሆነና ከእድሜው በላይ የበሰለ ልጅ ነበረ፡፡

ፊሊጶስ በተለየ መልኩ ለኢትዮጵያ ጥልቅ ፍቅር ያለው፣የእረፍት ጊዜ በመጣ ቁጥር እረፍቱን ኢትዮጵያ ማሳለፍ የሚወድ፣ ኢትዮጵያ ላሉ ቤተሰቦቹና ዘመዶቹ እንዲሁም ለአያቶቹ እጅግ የሚያዝንና የሚጨነቅ፣ በተለየ መልኩ ከልጅነቱ ጀምሮ ላሳደገችው እና ለተንከባከበችው ለአክስቱ ለየሺ ጥልቅ ፍቅር የነበረው ሁልጊዜ እንደሚናገረው ወደፊት እራሱን ሲችል ትልቅ ድርጅት ከፍቶ የሺን የድርጅቱ አስተዳዳሪ ማድረግ ሕልሙ ነበር፡፡ 

ልጃችን ፊሊጶስ በትምህርት ቤቱ በተማሪዎችና በመምህራን ዘንድ ታዋቂ፣በትምህርቱ ጎበዝ ፣ጓደኞቹን የሚወድ፣ጓደኞቹን የማያስነካ እንዲሁም አሳልፎ የማይሰጥ፣ በራሱ የሚተማመን ለመብቱ የቆመ ፣በጣም ተጫዋችና ቀልድ አዋቂ፣ ተጽእኖ ፈጣሪ፣ ለሀገሩና ለአለም የተለየ ነገርን ለመፍጠር ጽኑ ፍላጎት የነበረው ልጅ ነበር፡፡